Мэдээ

Н.Жанцанноровын охин Ж.Ариунжаргал: Хүмүүс намайг ааваасаа хамааралгүй, бие даасан хүн гэдгийг ойлгоосой

“Voice of Mongolia-2018” шоуны шилдэг оролцогч, дуучин Ж.Ариунжаргалыг танихгүй залуус ховор биз ээ. Түүнийг Төрийн хошой шагналт, Ардын жүжигчин, Хөдөлмөрийн баатар, хөгжмийн зохиолч Н.Жанцанноров гуайн охин гэж хүлээж авсанд гомдсон гэнэ шүү. “Жаахан гомдолтой байсан шүү. Гэхдээ тэр хүмүүсийг би бол буруутгах гээгүй л дээ. Миний оронд хэн ч хэзээ ч байж үзэхгүй. Би биш миний аав ард түмэнд илүү нөлөөтэй хүн. Яалт ч үгүй миний аавыг л түрүүлж харна. Гэхдээ хүмүүс намайг ааваасаа хамааралгүй, бие даасан хүн гэдгийг ойлгоод эхэлчихсэн гэж харж байгаа.

Хүмүүсийн шүүмж, үзэл бодол нь нэлээд татарч байгаа юм шиг анзаарагдаж байна. Би ер нь аавынхаа хамар, нүд, царайг нь дуурайсан. Ялангуяа миний хамар нүд бол яг аав. Бас аавын яриа, логикийг илүү дуурайсан юм шиг санагддаг. Аав чинь хэтэрхий олон юм ярьдаггүй. Ганц өгүүлбэрээр хүнд юм ойлгуулчихдаг. Хааяа гомдооё гэж бодоогүй мөртлөө шууд хэлээд гомдоочихдог. Жаахан хатуу. Тиймэрхүү зан чанарыг нь дуурайсан юм шиг санагддаг.

Аав надад “Чоно хэзээ ч, хэнээр ч хоолоо бэлдүүлдэггүй” гэж хэлж байсан. Ялангуяа эмэгтэй хүн биеэ даасан байх ёстой. Том юм мөрөөдөж байгаа бол биеэ даагаад, хүнд ерөөсөө найдахгүйгээр амьдралаа өөрөө бүтээ гэсэн үг. Энэ миний амьдралдаа баримталдаг том зарчмуудын нэг. Бид хүчтэй байх ёстой. Би хүмүүстэй харьцахдаа өмнөх Ариунжаргал ямар байсан одоо Ариунжаргал ямар байгаа тэр өөрчлөгдөөгүй гэж боддог.

Тэгэхээр би өөрөө өөрчлөгдөөгүй бол надтай харьцах хүмүүсийн ааш өөрчлөгдөхгүй л гэж боддог. Намайг өнгөц мэддэг хүмүүсийн хувьд иймэрхүү зүйл ажиглагддаг. Гэхдээ тэр чухал биш. Байдаг л зүйл. Урлагийн ертөнцөд бол байх л ёстой зүйл” хэмээн хэвлэлд өгсөн ярилцлагадаа тэрбээр онцлон ярьжээ.

Related Articles

Leave a Reply

 АНХААР!

Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд манай сайт хариуцлага хүлээхгүй.

Back to top button